O blog de Trivium

O sistema fluvial dos ríos Xubia e Castro, integrado na Rede Natura 2000, será o centro de atención das xornadas que se van celebrar no concello de San Sadurniño osvindeiros 10 e 11 de maio. Exporanse múltiples aspectos do espazo protexido e completarase o encontro o domingo cun percorrido pola zona.

Fai uns meses, deseñamos a ruta que percorre o Xubia río arriba desde a súa desembocadura ata as inmediacións de Pedroso, un entorno cheo de elementos de gran interese, desde o patrimonio industrial vinculado ao aproveitamento do caudal do río á biodiversidade apreciable nas súas ribeiras e humidais.
A mellor vía para a protección é o coñecemento, así que vos animamos a participar das xornadas.
O programa completo en Vieiros.

Entrada etiquetda con: Rutas, Medio Ambiente, Congresos e encontros, Traballos de Trivium | Sen Comentarios »

Hoxe remata o Congreso titulado “O patrimonio no século XXI”, celebrado na Facultade de Ciencias da Educación de Ourense e no que se lembra o centenario do etnógrafo e investigador Xaquín Lorenzo. Orientado a alumnos e profesores, nas xornadas revísase o estado actual dalgunhas das investigacións das que Xocas foi pioneiro: O xogo tradicional, os oficios, a tradición oral, … todo iso cunha certa vocación transfronteiriza vinculada á iniciativa da Candidatura de Patrimonio Inmaterial Galego-Portugués promovido pola asociación Ponte nas Ondas.

 

Das iniciativas e proxectos presentados, dous a destacar: O Proxecto Ronsel, ambicioso plan que aglutina numerosas actuacións encamiñadas á conservación e estudo do patrimonio cultural intanxible, e a ruta literaria que unirá as distintas figuras do Rexurdimento, a partir da iniciativa das Fundacións Rosalía de Castro e Curros Enríquez, coincidindo co centenario do pasamento deste último.

Enlaces relacionados.

- Programa completo do Congreso.

- Noticia en Canal Patrimonio.

Entrada etiquetda con: Patrimonio, Congresos e encontros | Sen Comentarios »

Rematados os traballos de investigación e redacción, o concello da Guarda presentou aos medios o Plan Director de Turismo, realizado polos técnicos de Trivium. Un documento preciso para a planificación estratéxica do sector nun concello que alberga un dos recursos máis visitados de Galicia, como é o monte de Sta. Trega, pero que precisa dun empuxe definitivo para se consolidar como destino e mellorar a calidade dos seus servizos.

O informe presentado parte dun diagnóstico exhaustivo da oferta e da demanda, despois da cal se recollen todos os programas básicos de actuación e as accións estratéxicas a levar a cabo, analizadas e clasificadas segundo a fase na que se deben desenvolver, os axentes implicados e a achega orzamentaria necesaria para a súa execución.

As liñas básicas de actuación están orientadas á mellora do producto turístico de A Guarda, a posta en valor dos recursos infrautilizadose e a consecución dun salto cualitativo na xestión e organización do sector.

 Así o recollen en:

 - Inforosal.com

 - Faro de Vigo

Entrada etiquetda con: Traballos de Trivium, Turismo | 2 Comentarios »

Entre mobles, arquivos e caixas de cartón, estes días están a ser moi atarefados mentres nos instalamos no noso novo estudio. Iso si, sen abandonar o corazón do casco histórico compostelán, un espazo único no que traballar e no que vivir. Agora estamos na rúa do Vilar, 46. Tras da porta do segundo á dereita seguimos a por en marcha os nosos proxectos. Todos sodes benvidos e benvidas.

Entrada etiquetda con: Uncategorized | Sen Comentarios »

Os visitantes que se acheguen ao concello de Teo poden percorrer o territorio polo que os 3.000 homes que comandaba o xeneral Solís avanzaron ata se enfrontar co exército nacional no alto de Montouto. Estamos en abril de 1846, e o pronunciamento contra o conservadurismo do Estado comezado en Lugo vai chegar ao seu punto de inflexión neste escenario. A desigualdade das forzas enfrontadas faría fracasar o alzamento e concluiría co repregamento a Compostela e detención dos instigadores nun primeiro momento e coa súa execución en Carral tras dun xuizo sumarísimo.

Co deseño e sinalización deste roteiro dáselle un novo pulo á reivindicación dun feito histórico que acadou grande importancia entre os intelectuais precursores do galegismo. O propio Murguía foi testemuño directo da fin da revolta en Compostela desde a súa casa no Cantón de San Bieito, a uns metros de onde escribimos estas liñas.

Actualización 24 de abril:

Onte cumpríanse 162 anos da batalla, data escollida polo concello de Teo para inaugurar a sinalización do roteiro da mellor maneira posible, facendo o percorrido cun grupo de escolares de Cacheiras e Carral.

Podese ler a noticia en:

- El Correo Gallego

- La Voz de Galicia

Entrada etiquetda con: Rutas, Patrimonio, Traballos de Trivium | Sen Comentarios »

A protección dos espazos naturais de Galicia está regulada pola Lei 9/2001, do 21 de agosto, de conservación da natureza, na que se establecen ata oito réximes de protección diferentes: reservas naturais, parques, monumentos naturais, humidais protexidos, zonas de especial protección dos valores naturais, paisaxes protexidas, espazos naturais de interese local e espazos privados de interese natural.

Concretamente, a declaración de monumento natural busca a protección de espazos ou elementos da natureza constituídos por formacións de notoria singularidade, rareza ou beleza que merecen ser obxecto dunha protección especial. Inclúense tamén nesta clasificación xacementos paleontolóxicos e formacións xeolóxicas, como é o caso de Pena Corneira; lugares sen a dimensión precisa para ser declarados parques naturais pero coa importancia suficiente para precisar de medidas que salvagarden a súa integridade.

Tanto a rechamante formación granítica que a conforma coma o bosque que a rodea son abondo para xustificar a declaración, que converte a Pena Corneira no sétimo monumento natural galego, despois da inclusión fai uns meses da Carballa da Rocha, a impresionante árbore próxima ao noso estimado pobo de Congostro, en Rairiz de Veiga.

No ámbito da promoción turística, a nova ten unha doble vertente: desperta a atención mediática por un lugar xa coñecido polos amantes da natureza -por aqui discorre o sendeiro PRG-78 e é destino de escaladores-, e entronca directamente co turismo rural e cultural. Asi e todo, a declaración so avanza o uso que do territorio fagan os visitantes, pero non promove un modelo de xestión que garantize a sostibilidade, que valorize o espazo natural como contribución ao desenvolvemento do territorio. Esas medidas corresponden a unha nova etapa, co desenvolvemento dos chamados “Plans Rectores de Uso e Xestión”, nos que a regulación dos usos turísticos debe quedar establecida.

Entrada etiquetda con: Medio Ambiente, Patrimonio | Sen Comentarios »

Xa fai uns meses tivemos a ocasión de descubrir o primeiro exemplar da colección Itinerarios Histórico-Musicais editada por Ouvirmos, que nos achegou á historia musical da cidade de Pontevedra. Nestes días presentáronse os seguintes exemplares da serie, correspondentes ás vilas de Celanova, Mondoñedo e Rianxo.

Queremos reseñar esta iniciativa por varias razóns, aínda que a principal é a de destacar a creación dun produto editorial que sabe combinar á perfección varios elementos:

• A vinculación ao territorio, ao patrimonio arquitectónico e cultural de cada unha das vilas, e, por extensión, á promoción do turismo cultural de cada unha delas.
• O deseño real dunha proposta de percorrido, documentado e sinalizado, que fai da guía un instrumento vivo que amplifica a experiencia do visitante.
• A difusión da investigación histórica nun campo, o do patrimonio musical galego, de grande importancia e moi pouco coñecido.
• Un formato, o Libro-CD, coidado, atractivo e moi práctico para calquera non iniciado na musicografía., no que se inclúen gravacións e guías de escoita de pezas nalgúns casos inéditas.

A serie continuará coas guías de Monforte, Compostela, A Coruña, Ribadavia, Ferrol, Betanzos, Lugo, Tui, Ourense, Vigo e Muros-Noia, co que teremos unha visión ampla da riqueza do patrimonio musical galego, desde as liturxias barrocas á música tradicional.

Enlaces relacionados:

• Nova na Dirección Xeral de Turismo.
• Video da presentación. Axencia Galega de Noticias.
• O país en clave de música. culturagalega.org.
• Catálogo on-line de Ouvirmos.
• Extracto da guía Itinerarios Histórico-Musicais. Pontevedra. culturagalega.org

Entrada etiquetda con: Publicacións, Patrimonio | Sen Comentarios »

Esta canle de novas e videos on-line creada para a divulgación e promoción do patrimonio, e impulsada pola Fundación Santa María La Real-Centro de Estudios del Románico, cumple este mes un ano de funcionamento con máis de 200.000 visitas rexistradas.

Canal Patrimonio recolle multitude de videos sobre os máis diversos temas: Museos, rutas, arqueoloxía, patrimonio inmaterial, turismo cultural, … permitindo incluso que os usuarios rexistrados publiquen os seus traballos. Os contidos da canle emítense seguindo a estructura da programación dunha cadea de televisión tradicional, coas vantaxes engadidas das novas texnoloxías: visionado dos contidos baixo demanda, interactividade, …

Este é o último elo dunha  filosofía de traballo que busca en todo momento a comunicación de todo o material recollido despois de anos de investigación como o único xeito de implicar á cidadanía na valorización e conservación dos bens patrimoniais.

- Máis información no seguinte dossier.

Entrada etiquetda con: Patrimonio, Novas Tecnoloxías | Sen Comentarios »

O encontro do sábado en Camelle foi unha ocasión clara de ver a multitude de enfoques e factores que inflúen no legado e a memoria do traballo e a vida de Man, o alemán de Camelle. Ao longo de todo o día sucedéronse as intervencións de todo tipo: Experiencias persoais en relación con Manfred, lecturas de poemas, estudos realizados, propostas de rehabilitación, música…, unha chea de sinais que nos deixan dúas sensacións: boas intencións para frear o abandono que sufriu o legado de Man estes últimos cinco anos e a necesidade dunha xestión clara e competente que aborde unha situación en principio complexa.

Polo momento, varios elementos están claros:

- A creación do centro cultural Casa do Alemán dota a Camelle dun espazo no que conservar o legado de Man, un espazo que haberá que redefinir segundo as necesidades, das que xa se veu algún exemplo na xornada do sábado (problemas de espazo e recursos para un encontro que superou as expectativas de participación).

- A verdadeira Casa do Alemán, á beira de peirao, plantexa uns problemas de conservación importantes, xa que toda ela e o seu entorno formaba parte da obra viva de Man, unha obra en transformación permanente. Tanto así, que nos momentos posteriores a que a marea negra cubrise as costa de Camelle, o propio Man declarou que non debería de limparse, para deixar testemuño da vileza do propio ser humano. O deterioro ocasionado polo fuel, os traballos de limpeza, engadidos ao vandalismo e o abandono destes anos obrigan a que a intervención sexa inminente, canto menos para deter o progresivo deterioro. Os criterios para esta intervención tamén foron fonte de debate, para establecer o límite entre a conservación e a reconstrución dos espazos creados por Man.

- O legado de Man componse de moi diversos materiais, algúns recentemente descubertos. Unha tradución dos seus escritos en alemán faise indispensable para abordar o seu pensamento, así como a exposición das aportacións de todos cantos o visitaron en vida e deixaron reflectidos -nas xa famosas libretas que repartía- o seu retrato e as súas impresións. Un exemplo máis da obra de Man como algo en evolución e de múltiples interpretacións.

- A necesidade dunhas liñas que apunten os criterios e as prioridades no traballo a desenvolver, algo que entronca directamente coa creación da Fundación Man, e remite ao proxecto que a principios de ano entregaron ao concello os profesores da Escola Superior de Restauración e Conservación de Bens Culturais de Galicia, Carme Hermo e Antón Sobral, impulsor do Encontro.

- A focalización en Camelle, un territorio agora para sempre ligado á figura do artista, do espazo de traballo doutros artistas vinculados ao Land-Art, despois da celebración do I Encontro de Arte e Natureza, que reuniu a unha vintena de artistas á sombra do recoñecido Nils Udo.

 

Novas relacionadas:

- El País.

- La Opinión.

- La Voz de Galicia.

- El Correo Gallego.

Entrada etiquetda con: Patrimonio, Congresos e encontros | Sen Comentarios »

Todos os visitantes que chegan a Camelle se fan a mesma pregunta cando se achegan ao que fora o fogar de Manfred Gnädinger. Que vai ser do legado que deixou Man? Un patrimonio que vai máis alá das construccións que todos podemos ver xunto ao peirao, senón que inclúe o seus lenzos e escritos, en proceso de catalogalos e protexelos.

O I Encontro Man de Camelle ten como obxectivo o debate, a achega de ideas e propostas, e o recordo da súa figura e unha reivindicación de actuacións claras encamiñadas a dar a coñecer a traxectoria vital deste inigualable artista e da súa pegada no territorio e a conciencia colectiva da Costa da Morte.Mañá 17 de novembro, a partir das 11:00 da mañá, no Centro Cultural Casa do Alemán en Camelle.

Relacionado:

- Web de amigos do Museo de Man.

- Noticia en El País.

- Noticia en camarinas.eu: Primeiros pasos para a conservación do Museo de Man.

Entrada etiquetda con: Patrimonio, Congresos e encontros | Sen Comentarios »